14‏/9‏/2013

الطابلة، المايدة

في رايكُم، واش هو أصل كلمة طابلة؟ رايحين تقولولي "table" من الفرنسية. لالا، هاذ الشي ماكاش منه. كاين واحد القاموس تاع الدارجة الدزيرية من 1838، ثمن سنين بعد ما دخلت فرانصة. كي تحوّس فيه على كلمة "table"، تلقى زوج كلمات: "طابلة" إيلا كانت عالية، و"مايدة" إيلا كانت حابطة. والفرنسيين كي لحقو وسمعوها حسبوها جاية من السبنيولية (كيما قال Delaporte 1841).

بصّح نقدرو نزيدو نبعدو. كاين قاموس عربي-لاتيني من القرن الثلطّاش لقاوه في الطليان، يظهر بللي من أصل أندلسي. حوّس فيه على mensa (اللي هي الكلمة اللاتينية لي معناه "طابلة") وهاذا واش تلقى:

mensa: مائدة ومايدة موائد ومواد * منقلة مناقل * سفرة سفر * طبلة ات * تيفور توافير
في القرن الثلطّاش ما كانش كاين تأثير فرنسي، لا في الدزاير ولا في الأندلس. أصل الكلمة لاتينية على كل حال، من كلمة tābula لي معناه لوحة. وفي رحلة ابن بطّوطة (المغربي) نلقاو كلمة "طبلة" بمعنى "لوحة" ولاّ "پلاتفورم":
ورأيت بمدينة منجرور رجلاً من المسلمين ممن يتعلم منهم، قد رفعت له طبلة، وأقام بأعلاها، لا يأكل ولا يشرب مدة خمسة وعشرين يوماً، وتركته كذلك. (ص. 272)
الحاصول بالاك لحقتنا على السبنيولية، ولا بالاك لحقتنا ديراكْت من اللاتينية، بصّح الأكيد مالحقتناش من الفرنسية. من ثمن ميات سنة ولاّ كثر وحنا نقولو "الطابلة".

يمكن تقوللي الطابلة بالفصحى هي الطاولة، وهاذي هي الأصل؟ لاء، حتّى هاذي ماكاش منها. حوّس على كلمة "طاولة" في لسان العرب وتاج العروس وكل القواميس الكبار نتاع بكري، ماتلقاهاش. حوّس عليها في كتب التراث، ما تلقاها حتّى القرن التسعطاش. طاولة كلمة عامّيّة مشرقية دخّلوها للفصحى، وأصلها من الطليانية: tavola.

امّا المايدة هي عربية فصحى قديمة: كل واحد سامع بسورة المائدة!

هناك 7 تعليقات:

reinventdz يقول...

كنت رايح نْسقسيك على هاذ الشي بصح انت فتني ليه يعطيك الصحة. خليني نسقسيك سؤال و قلِّي صح و لّا والو. كلمة "طابلة" بلاك صح أصلها من الفصحي، بصح هل في رايك كانو الناس يستعملوها في الدزاير قبل ما تدخل فرنسا. أوّاه مانضنش! على خاطر الناس ماكانوش ياكلو في الطوابل ْو لغْلبية نتاعهم ما يعرفوش حتى كيفاش كانت دايرة قبل ما تدخل فرانسا. بلاك صحيح هي كلمة عربية بصح فرانسا هي لي دخلتها و الناس حسبوها كلمة ڨاورية. آنا انضن بلي كاين ليستا طويلة نتاع كلمات ڨديمة و أصلها الفصحى و معاها كلمات بنفس المعنى بصح جاية من الڨاورية. كيما ڨُلت نْتا ڨبيل:"المايدة و الطابلة"، و لّا "القلم" الّي مخدوم من لڨصب و الّي يكتبو بيه بكري القرآن في اللوحة عَند الطالب. ضرْكَ نڨولو "ستيلو". "الدواية" نتاع السمغ و "لونكريي"(Encrier). "لحبل" و "الكوردة".

Lameen Souag الأمين سواق يقول...

صحّ بللي بكري كنّا كاملين ناكلو من المايدة، ماشي من الطابلة. بصّح الدزاير العاصمة كانت مدينة كبيرة، فيها آلاف الڤْور لي كانو والفو الطابلة قبل ما يجو للدزاير. وحتّى الجزايريين كانو بحرية، كانو يشوفو الطوابل كي يفوتو على مرسى في اسبانيا ولاّ فرانصة ولاّ الطليان. مادام بزّاف منهم يعرفو الطابلة، كان لازم يكون عندهم الكلمة. وماشي موحال كانو يستعملوها حتّى في الدزاير لأغراض خاصة.

على كل حال ماقلتش بللي أصلها من الفصحى - هي إما من السبنيولية ولاّ من اللاتينية. قلت برْك بللي دخلت الجزائرية قبل ما تدخل فرانصة.

reinventdz يقول...

على كل حال البلوڨ نتاعك هايل بزاف و كل مرة راني نتعلم حاجة نكون نحسبها شي و من بعد تطلع شي ثاني. مثلا حكاية السبالة ماضنيتش رايح نلڨاها حتى شرحتها انت. راني شوية ما هنا حالة في "التايبينڨ" بالعربية، بالصح راني رايح "نكونبيلي" ليستا انتاع كلمات راهم امداوخيني و نرسلهملك تفتيلنا فيهم نشالله.

Lameen Souag الأمين سواق يقول...

يعطيك الصحة أ السي reinventdz، ويعطيك الصحة على الملاحظات.

باش نزيد ننحّي الشك صبت كلمة "طابلة" في كتاب من 1830 نفسه: Vocabulaire français-arabe: suivi de Dialogues à l'usage de l'armée d'expédition d'Afrique.

غير معرف يقول...

أول مرة نقرا نص مكتوب بالدارجة الجزايرية, بصراحة تجربة مثيرة و تستحق المتابعة, خاصة و انكم قاعدين تكتبو في مةاضيع متخصصة نوعا ما. و زيد من فوق سي الأمين سواق اللي موالفين عليه ديمة يكتب باللغة الانقليزية الاكاديمية نتعه اللي تدوخ و اللي نحلم يجي نهار و نولي انجم نكتب كيفها! تبارك الله عليك يا الامين عالمستوى و العلوم نتاعك في علم اللوغة! شي قوي يا صاحبي :-)

صهيب ز.

Souhaib يقول...

سؤال أوخر: مش ممكن اللي الكلمة تكون جاية من اللنقوا فرانكا؟ كيما قلت انت الجزايريين كانو بحارة و كانو يمشو للبرط في اسبانيا و فرانسا و ايطاليا و يشوفو حاجات مافماش في بلادهم و زادة القورة كانو يجيبو معاهم حاجات و سلع مش موجودين عندنا و كانو اجدادنا يستخدمو تسميات القورة ليهم.

يعني بطريقة اخرى هل تسربت كلمات من اللنقوا فرانكا للهجات المغاربية ام ان اللنقوا فرانكا بصيفتها لغة يحكو بيها طبقة معينة بركة من الناس ماكانش عندها احتكاك برشا مع اللغة الدارجة المحكية و اللي كي نحبو نفهمو اصل الكلمات منين جاي لازم نشوفو اللغات الكبيرة السع قبل ما نخممو في اللنقوا فرانكا؟

كشف تسربات المياه يقول...

http://www.tasrobat.com/index.html
كشف تسربات المياه
افضل شركه كشف تسربات
شركه كشف تسربات
شركات كشف تسربات المياه
تسرب المياة
كشف تسربات
كشف تسربات المياه بالرياض
شركه كشف تسربات المياه بالرياض
افضل شركه كشف تسربات المياه بالرياض
كشف تسربات المياه بالرياض عماله فلبينيه
شركه عزل مائى بالرياض
عزل مائى
شركه عزل خزانات بالرياض
عزل الاسطح
عزل خزانات
شركه عزل اسطح بالرياض
نقل اثاث بالرياض
نقل عفش بالرياض
نقل عفش
نقل اثاث
شركه تنظيف منازل بالرياض
تنظيف منازل
نظافه
شركه نظافه
شركه تنظيف بالرياض
شركه نظافه عامه بالرياض
مكافحه حشرات
رش مبيدات
رش مبيد
شركه رش مبيدات بالرياض
شركه مكافحه حشرات بالرياض
رش مبيدات حشريه
رش مبيدات حشريه بالرياض