جدود جدودنا كيفاش كانو يهدرو؟ صبت واحد اللقطة تعطيك فكرة: تسجيل بالدارجة داروه في 1900 لواحد المعرض في پاري. قالو باللي اللي راهي تهدر من ولاد نايل، بصّح كي تسمعها باين باللي ماشي الهدرة تاع ذيك الجيهة - تهدر بالقاف... بصّح واعر شوية باش تسمع واش راهي تقول على جال التسجيل راه يغصب. تبدا "واحد المرا خلاّت وليدها. حين خلاّتو قالت..."
كاين حاجة برك فيها اللي يبيّن لك باللي ماشي تاع ضرك: ما دخّلت حتّى كلمة تاع رومية. إيه، كانو جدودنا لي عايشين تحت الاحتلال يهدرو قلّ بالفرنسية من ولاد ولادهم لي زادو مور الاستقلال - حوّس تفهم...
عندهم ثاني تسجيل قبايلي من نفس الوقت، من الاربعا ناث إراثن: "ماشاهو غف ييون ذي زمان أمزوارو يزنزا لاتاي ذي الزّناق..."
مالقيتش تسجيلات تاع الدارجة وَلا تاع القبايلية قدم على هاذ الزوج، وما نعرف إيلا كاينين. خاطر المسجّل اخترعوه في 1877 برك، صافي قبل 33 سنة من ذاك الوقت.
هناك 3 تعليقات:
صحيح لمرة تهدر بالقاف، بصّح كِي تسمع لمْرَة تْقَنِّي في قُنّاية الطْهارة، كانت تنطق "القاف" "ڨ". وْ كانت تذكر البليدة في كلامها. جابلي ربّي ياإمّا هاذُم زوج نْسَا، وحْدة من وْلاد نايل، أُو وحْدة من لبليدة، ولَّا هذي مْرَا وَحْدة من ولاد نايل بصّح ساكنة في جوايه لَبليدة. زمان بكري كانوا ولاد نايل يرحلو من جيهة لجيهة، في الصيف يْضهروا وْ في الشتا يْڨبلوا، أُُُُُو يُوصلو حتّى لدزاير وْ بلاد لقبايل وْ التيتري.
التسجيل هايل ! إذا عندك تسجيلات اخرين تع الفترة هاذيك ماذابيك تنشرهم في الصّفحة,
مشكور مسبّقا
هاذي نايلية ولاد نايل و الجلفة كامل يهدروا بالقاف و راها تهدر على واحدة دابزت مع راجلها كي ضربها و دالها وليدها .و المورسو 2 و 3 غنا تاع عرس و 4 غنية تاع الترحال علاه تذكر بليدة .
إرسال تعليق